Em geral, positiva. Numha altura em que nom havia nenhumha actividade cultural na comarca, decidimos fazer um festival poético. Queríamos defender a filha pobre da literatura e fazer-lha chegar à gente. Passámos por momentos delicados, mas o festival conseguiu umha assistência importante e mantivo-se frente aos atrancos. Um exemplo do êxito foi que poetas bascos e valencianos, que tinham recitado no Condado, organizárom nos seus países festivais inspirados no nosso.

Que vos levou a voltar este ano?

A necessidade de recuperá-lo e a ilussom e o trabalho das pessoas da SCD fixêrom que o tentássemos de novo. Decidimos começar umha andaina que esperamos dure tanto como a passada. Queremos seguir defendendo a cultura, desde umha perspectiva reivindicativa e de denúncia das injustiças. É para o que deve servir a cultura, nom para ficar em bonitos discursos inúteis.

Outro mundo é possível.

Seguimos na linha dos últimos anos, com um lema reivindicativo. Queremos que a poesia vaia por esse caminho. Falamos de um outro mundo mais justo, que supere as diferenças abismais que existem entre ricos e pobres. Estamos contra esta globalizaçom imposta polo sistema capitalista.

Que trai de novo esta ediçom?

Passamos a ter dous dias de festival em vez de um. Ademais, este ano a maior parte som poetas e poetisas novéis que tenhem publicado algum livro o ano passado. Pretendemos difundir as suas obras e dá-los a conhecer. Á sua vez, pedimos-lhe que se comprometam com a situaçom actual.