A Sociedade Cultural e Desportiva (SCD) do Condado é umha organizaçom aberta e plural que trabalha pola difussom da cultura galega desde umha perspectiva de compromisso com o País e o seu desenvolvimento sócio-cultural.

Está apoiada por mais de cento e cinquenta sócios e sócias e nela participam sectores nacionalistas, independentistas, pessoas de esquerda e activistas de todo tipo, que compartem a vontade de trabalhar pola animaçom cultural da comarca como contributo ao desenvolvimento da nossa identidade.

Com sede em Salvaterra de Minho, tem como ámbito de actuaçom a comarca do Condado, anque centra o grosso das actividades no concelho raiano.

Independente de instituiçons e nascida em Novembro de 1.973, a SCD tem realizado numerosas actividades ao longo da sua história. Desde 1.981 organiza o Festival da Poesia, o encontro poético-musical e cultural de maior envergadura na Galiza. Esta festa da cultura “tenta de ser o xérmolo do xunguimento, nunha nova perspectiva, no que o factor común seña a unidade solidaria diante da agresión cotián”, como dizíamos na apresentaçom da primeira ediçom.

Na actualidade centramos a maior parte do nosso trabalho na organizaçom do Festival, e seguimos a realizar festas populares como os magostos e outras actividades de tipo cultural e social.