O Hotel Balneário
de Mondariz acolhe amanhá 24 de Agosto, a partir
das 12.00 horas, a apresentaçom do XX Festival da
Poesia no Condado e do livro que recolhe a antologia poética
desta ediçom. Este ano fam-se 25 anos de que se celebrara
a primeira ediçom do Festival, e a Sociedade Cultural
e Desportiva do Condado(SCD), organizadora do evento, amplia
as datas e o cartaz para comemorar um aniversário
que se desenvolve sob a legenda de “25 anos construindo
futuro”.
No acto de apresentaçom vam intervir, para além
de um representante da SCD Condado, umha das poetas que
intervenhem este ano no Festival, Marta Dacosta, os alcaldes
de Salvaterra, Arturo Grandal, e de Mondariz Balneário,
José Antonio Lorenzo, o Presidente da Autoridade
Portuária de Vigo, Abel Caballero, o gerente do Jacobeu,
Ignacio Rodríguez Eguíbar, um representante
da Conselharia de Cultura e os gerentes de Adegas Galegas,
Adegas Filhaboa e Hotel Balneário de Mondariz. Para
encerrar o acto, Tino Baz entonará umhas peças
mentres se sirve um vinho aos e às asistentes.
Comboio e autocarro de balde
Umha das novidades que apresenta este ano o Festival da
Poesia no Condado é a possibilidade deslocar-se de
balde a Salvaterra em comboio ou em autocarro. Este serviço
disponibiliza-se os dias 1 e 2 de Setembro, para facilitar
a asisténcia e incrementar a segurança do
público.
O comboio fará o percorrido Vigo – Redondela
– Porrinho – Salvaterra, com saida a Sexta-Feira
1 de Setembro às 20.30, e retorno às 05.00
da manhá do Sábado. O día 2 serám
dous os comboios que saiam de Vigo, com as mesmas paradas.
O primeiro, reservado às pessoas que reservem a sua
entrada na Federaçom de Asociaçons de Vizinhos
de Vigo Eduardo Chao, sae de Vigo às 11.30 e retorna
às 00.30; o segundo sae de tarde, às 18.30,
e volta às 04.00 horas. É preciso reservar
bilhetes, que se podem recolher em qualquer dos seguintes
locais de Vigo: Local Social A Revolta, Cova dos Ratos,
CIG, Galiza Nova, AAVV Eduardo Chao, Sete Mares, Maix e
Inmobiliaria Gestihogar.
O autocarro fará um percorrido comarcal desde Mondariz,
com paradas em Ponte Areas e Fornelos, até Salvaterra.
O 1 de Setembro sae às 20.30 de Mondariz, para regresar
às 05.00 da manhá. No Sábado 2 de Setembro
o autocarro fará duas viagens: a primeira sae às
18.00 de Mondariz para voltar às 00.00, e a segunda
sairá às 20.00, com retorno às 04.00.
Como no caso do comboio, é preciso reservar bilhetes
nos seguintes lugares: Hamburguesería Mini e Cafetaria
Gonixul de Mondariz; Bar Lourdes e BNG de Mondariz Balneário;
e Salón Parroquial, Casa da Triga e A Baiuca Vermelha
de Ponte Areas.
“25 anos construindo futuro”
As novidades som várias em esta XX ediçom
do Festival da Poesia, que conmemora os “25 anos construindo
futuro” da festa do Condado. Para além do autocarro
e o comboio gratuitos, este ano amplia-se o cartaz em um
dia. A festa arrinca a Quinta-Feira, 31 de Agosto, com a
abertura das exposiçons, umha jornada do audiovisual,
e a Noite dos Açores, com Zeca Medeiros. A Sexta-Feira,
1 de Setembro, para além da segunda jornada do audiovisual,
celebra-se a partir das 22.30 horas o Festival Ska/Hip Hop,
que apresenta Xurxo Souto, no que vam actuar Dios Ke Te
Crew, Betagarri e Banda Bassotti.
O Sábado 2 de Setembro celebra-se o Recital Poético
Musical baixo a batuta de Mofa e Befa. As actuaçons
musicais correm a cargo de Donicelas, Tino Baz, A Quenlla
e Miro Casabella, Terrakota e Lamatumbá. Em quanto
aos e às poetas, este ano recitarám Cesáreo
Sánchez, Antia Otero, Lucía Novas, Xulio López
Valcárcel, Eduardo Estévez, José Alberte
Corral Igrejas, Luz Fandiño, María do Cebreiro,
Séchu Sende, e Marta Dacosta. Como convidados participam
Leire Bilbao, de Euskal Herria, Luis Filipe Cristovao, de
Portugal, e Guita Jr., de Moçambique.
|
