Pese ao forte temporal da tarde, o Festival da Poesia juntou centos de pessoas na noite do sábado, dando a despedida às anteriores jornadas de festa e de reivindicaçom, que superárom em público às passadas ediçons. A chúvia obrigou a aprazar o concerto, que terá lugar o próximo sábado 9 de Outubro.

O Festival deste ano começava com bom pé no 2 de Setembro, com um II Dia do Audiovisual Galego que juntou umhas duascentas pessoas a ateigar a Casa da Cultura. No dia seguinte, a Noite Galega vibrou ao som de Uxia Senlle e o seu grupo, ao calor do caldo e o vinho, deixando dúzias de pessoas sem entrada que tivêrom que conformar-se com assistir ao concerto de pé. A festa seguiu até bem entrada a madrugada ao ar livre.

A manhá do sábado dava passo às exposiçons, o tradicional 'comboio malandro', as conferências, os concertos, o passa-ruas e o roteiro de Galeguiza, que levou um grupo de trinta pessoas a conhecer o valor das pesqueiras do Minho e a riqueza ameaçada polas eléctricas.

Todo parecia augurar um Festival Poético-Musical concorrido, segundo os cálculos da organizaçom, mas pouco antes das 7 da tarde, um fortíssimo temporal acompanhado de tronada botou por terra as espectativas, estragando aparelhos de som, instrumentos e danando o palco. Média hora ininterrompida de chúvia e vento obrigárom a suspender o concerto e levárom a Festa Infantil para as covas de Dona Urraca.

O pessimismo invadiu o ambiente, mas para surpresa da organizaçom, o Festival contou com umha assistência mui boa para as circunstáncias: mais de médio milhar de pessoas passárom polo Festival, enchendo as Covas de Dona Urraca para atender à poesia. A nota musical puxo-a o cantor guardês Tino Baz que, com guitarra emprestada, improvisou umha actuaçom. Trás el seguírom-lhe gaiteiros que iam tocar no Festival (da Xistra) e outros que se apontárom ao convívio, prolongado no bar da SCD Condado até o nascer do dia.

A próxima cita será o 9 de Outubro, na Praça do Castelo ou, se o clima volve virar-se, no pavilhom municipal. Aguardam-nos Mercedes Peón, A Matraca Perversa, Xistra e o grupo cubano Aché.