Nos passados dias a empresa de transportes MRW em colaboraçom coa cadeia SER, desenvolvérom umha campanha de solidariedade co povo galego denominada "ningún niño gallego sin juguetes".

Pretendérom recolher brinquedos entre a populaçom do Estado Espanhol para achegar-lhos a todos os nenos e nenas galegas afectadas polo despropósito do Prestige. Isto nom foi mais que umha outra forma de humilhar-nos, como se nom tivéssemos avondo já. Entendemos que, dentro do ánimo destas iniciativas, à que podemos engadir o programa "Todos somos Galicia", apresentado por Pedro Ruiz, se confundem gravemente os conceitos de caridade e justiça social: Os Galegos e Galegas nom pedimos esmola, exigimos justiça.

Os actos de caridade som os próprios para serem desenvolvidos em paises com graves crises sócio-económicas, bairros marginais, colectivos sociais nom integrados ou gravemente desfavorecidos pola sociedade..., situaçons todas nas que as populaçons afectadas nom disponhem nem de recursos nem de meios. Mas, o que nós pedimos é que se nos permita gestionar os nossos próprios recursos económicos e sociais.

Queremos explotar a nossa pesca, os nossos recursos hídricos, minerais, agro-gandeiros, florestais... conforme às nossas capacidades e necesidades, isto é, o que precisamente se nos está a negar historicamente tanto desde o Governo Central como desde os centros de poder da Uniom Europeia.

O que precisam as nenas e os nenos galegos é que os seus pais tenham trabalho. Trabalho possível para todos nós sempre e quando estes nossos recursos forem gestionados conforme aos nossos intereses e nom aos do "inglês".

Associaçom Cultural Alto Minho
Lugo