ALTO MINHO, UMHA ORGANIZAÇOM CULTURAL DE MARCADO CARÁCTER SOCIAL

A Associaçom Cultural ALTO MINHO é um projecto cultural que agrupa a pessoas de ámbitos sociais e culturais diferentes, sempre dentro do galeguismo, e que fora de dogmatismos e sectarismos decidem pular por umha estratégia cultural comum, plural e aberta. É a síntese de umha série de colectivos que, desde havia tempo vinham trabalhando nesta cidade a prol da língua e a cultura da nossa nacionalidade. Sendo pois galeguistas, nom é de estranhar que bebamos das fontes do galeguismo histórico e, que tentemos levar à prática algumhas das doutrinas de Murguia, Viqueira e Castelao, que à sua vez se fundárom nas de Feijó, Sarmiento e Pintos. Será portanto, fim principal da nossa associaçom, a defensa da cultura nacional, tentando promover caisquer actividades culturais que tenham essa finalidade, abrangendo a língua, a literatura, a história, a música, a gastronomia, as artes e demais elementos que constituem a nossa identidade. Fomentar o uso, estudo e promoçom da língua própria do povo galego, de maneira a que se consiga na Galiza o seu emprego normal, é importantíssimo para nós, já que como Castelao dizia, se ainda somos galegos é por obra e graça do idioma.

Mas ALTO MINHO compreende que estamos no mundo e por isso tentamos dar a conhecer tamém o que nel acontece. De aí traermos conferenciantes doutras nacionalidades como colombianos, saarianos, etc., para explicarem a sua situaçom social e cultural. Assemade, o feito de dispor de local para as nossas actividades e pô-lo a disposiçom de todas as pessoas e associaçons cuja finalidade seja cultural e/ou social, dá um marcado carácter social à associaçom. ALTO MINHO tamém dá umha grande importáncia à Mocidade. De facto nos seus estatutos tamém figura como fim da mesma, a criaçom de umha Secçom da Mocidade. Mas isto nom som só palavras. A Direcçom de ALTO MINHO está constituída, neste momento, por 9 pessoas cuja média de idade nom chega aos 30 anos, estando 4 delas entre os 18 e os 25.

Tino Pinheiro (Presidente da Associaçom Cultural Alto Minho)

Local Social: Ramom Montenegro 12 baixo, Lugo

Apartado dos Correios 289, Lugo